आवडती जुनी हिंदी गाणी: ३. मेरी बीना तुम बिन रोये

देख कबीरा रोया... एक सदाबहार विनोदी चित्रपट! (1957) नसेल बघितला तर बघा😂 

खरे तर नावापासूनच गंमत सुरु होते. कबीराचा एक दोहा आहे. 

"चलती को गाड़ी कहे ,खरे  दूध का खोया ,

रंगी को नारंगी कहे ,देख कबीरा रोया।"

 

समोर जे दिसतय, जे हातात आहे ते नाकारून, पळत्याच्या मागे लागणं हे कसं चुकीचं आहे हे समजावणारा हा दोहा. 

हीच शिकवण एका प्रेमकथेतून सांगण्याचा हा प्रयत्न. चित्रपटाच्या शेवटी हा दोहा येतो. जुन्या काळचे, मूल्य शिक्षण देणारे चित्रपट हे 😇

तीन कपल्स अन त्यांची गंमतजंमत. जुना चित्रपट आहे, सो भाबडा, साधा, थोडा संथ आहे. पण गाण्यांची मैफिल अगदी!

एकसे एक गाणी आहेत. संगीत मदनमोहन. शुभा खोटे, अनिता गुहा, अमिता, अनूप कुमार, जवाहर कौल, दलजित असे कमी माहितीचे कलाकार. पण दिग्दर्शक अमिया चक्रवर्तींनी जी काही कमाल केलीय!

तीन जोड्यांची आपापसातल्या आवडीनिवडीची सरमिसळ आणि ती सांभाळण्यासाठी नायकांची कसरत, त्यातून होणारे गैरसमज, गोंधळ. आणि त्या सगळ्याची नंतर सोडवणूक. अशी गमतीशीर गोष्ट, पण गाणी ऐकली तर वाटतं कि खूप गंभीर, रडका चित्रपट आहे कि काय.

सोबत जुनं मुंबई पहाणं हेही एक सुख!

यात एके ठिकाणी ही तीन गाणी एकापाठोपाठ येतात. म्हटलं तर दु:खी, सिरियस गाणी. पण चित्रपट बघताना मनात मिश्किल हसू घेऊन येतात. तीनही गाणी एकमेकांत छान जेल केलीत - त्रिवेणी संगमच जणु! संगीतकाराने केलेला एक वेगळा प्रयोग. जरूर ऐका, पहा. 

मेरी बीना तुम बीन रोये,अशकों से तेरी हमने आणि तू प्यार करे या ठुकराए!

एंजॉय😃